សង្ឃទីប្រឹក្សា ហោ សុខុន បានសុំបិណ្ឌបាតសម្ដេចអគ្គមហាសេនាបតីតេជោ ហ៊ុន សែន ឲ្យជួយចាត់ការករណី ដែលព្រះអង្គបានប្ដឹងលោក ខឹម វាសនា ទៅក្រសួងមហាផ្ទៃ កាលពីថ្ងៃទី២៧ ខែវិច្ឆិកា ឆ្នាំ២០១៧កន្លងទៅថ្មីៗនេះ។
បន្ទាប់ពីចំណាយពេលប្រមូលស្នាមមេដៃអស់រយៈពេលបួនខែទៅហើយ នៅតែមិនបានចំនួនច្រើនទៀតនោះ សង្ឃ ហោ សុខុន ចៅអធិការវត្តច្បារអំពៅ បានសម្រេចចិត្ត សរសេរសារសុំឲ្យសម្ដេចនាយករដ្ឋមន្រ្តី ជួយអន្តរាគមន៍ ដោយសរសេរបង្ហោះតាមរយៈបណ្ដាញសង្គមFacebookជាសារធារណៈ និងបានប្រៀបប្រដូចសម្ដេចទៅនឹងព្រះឥន្ទ ដែលជាស្ដេចនៃទេវតាទាំងឡាយ អាចបញ្ជាឲ្យពពួកទេវតាធ្វើអ្វីៗបានតាមតែចិត្ត ។
យ៉ាងណាមិញសង្ឃហោ សុខុន បានមានដីកាលើគេហទំព័រFacebookរបស់ខ្លួន ដែលមានឈ្មោះជាភាសាអង់គ្លេសថា Hor Sokhonនោះ គឺសុំបិណ្ឌបាត ឲ្យសម្ដេចនាយករដ្ឋមន្ត្រី ជួយបញ្ជាកូនចៅឲ្យលូកដៃក្នុងករណីដែលព្រះអង្គបានប្ដឹងទៅលោក ខឹម វាសនា ដែលបានយកបណ្ដឹងទៅដាក់នៅក្រសួងមហាផ្ទៃរួចហើយ។
ការសរសេរសារសុំអន្តរាគមន៍ពីសម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបែបនេះ ធ្វើឡើងនៅថ្ងៃទី៣០ ខែវិច្ឆិកា ឆ្នាំ២០១៧ ក្រោយពីចៅអធិការវត្តច្បារអំពៅអង្គនេះ ទទួលបាននូវលទ្ធផលខកចិត្តយ៉ាងខ្លាំង ព្រោះខុសពីការរំពឹងទុកឆ្ងាយពេក ដោយរំពឹងទុកថា នឹងមានព្រះសង្ឃចូលរួមគាំទ្រ ផ្ដិតមេដៃ ប្រាំមួយម៉ឺនអង្គ និងពុទ្ធបរិស័ទចូលរួមផ្ដិតស្នាមមេដៃគាំទ្រឲ្យចាត់ការលោក ខឹម វាសនា ជាងដប់លាននាក់ តែសង្ឃអង្គនេះ ខំពន្យាពេលដល់ទៅបួនខែទៅហើយ នៅតែបានជាងប្រាំមួយរយអង្គនាក់ប៉ុណ្ណោះ នេះបើគិតសរុបទាំងស្នាមមេដៃដែលប្រមូល មកពីខេត្តស្វាយរៀងថែមទៀតផង។
ថ្វីបីក្រសួងធម្មកានិងសាសនា អះអាងយ៉ាងណាក៏ដោយថា បណ្ដឹងរវាងសង្ឃហោ សុខុន និងលោក ខឹម វាសនា នេះជាបណ្ដឹង ឬជាជម្លោះរវាងបុគ្គល និងបុគ្គលក៏ដោយ ក៏ចៅអធិកាចិត្តក្ដៅអង្គនេះ ព្យាយាមទាញយកមកពាក់ព័ន្ធរឿងការពារតម្លៃព្រះពុទ្ធសាសនា ហើយថែមទាំងអះអាងយ៉ាងឱឡារិកថា ការប្ដឹងនេះគឺជាតំណាងឲ្យព្រះសង្ឃនិងពលរដ្ឋខ្មែរទូទាំងប្រទេស។
ករណីសុំឲ្យលោកនាយករដ្ឋមន្រ្តីជួយបញ្ជាកូនចៅក្រោមឱវាទ ឲ្យជួយចាត់ការចំពោះករណី ដែលប្ដឹងលោក ខឹម វាសនានេះ គឺដើម្បីសងមកវិញជាការផ្សះផ្សារ និងព្យាបាលផ្លូវចិត្តរបស់ខ្លួន ក៏ដូចជាព្រះសង្ឃទូទាំងប្រទេស។ សង្ឃហោ សុខុន អង្គនេះបានសន្យាថាបើសម្ដេចព្រមជួយ នោះខ្លួននិងព្រះសង្ឃទូទាំងប្រទេសគោរពដឹងគុណសម្ដេចហើយចងចាំទុកក្នុងចិត្តជារៀងរហូត។
បន្ថែមលើសពីនេះ ម្ចាស់បណ្តឹងសង្ឃហោ សុខុនបានលើកសរសើរថា សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា អាចផ្តល់បុណ្យផ្តល់សំណាង អាចផ្តល់យុត្តិធម៌ ដល់ព្រះសង្ឃ និងប្រជាពលរដ្ឋខ្មែរ សម្តេចតេជោ ជាក្តីសង្ឃឹមធំបំផុត៕
ប្រភព៖ Khmer Share-
http://www.khmershare.news/uncategorized/article/1903/
